Новы спектакль - візітная картка з'явіцца ў Коласаўскага тэатра

Паводле слоў дырэктара, тэатр ужо даўно мае патрэбу ў сучаснай пастаноўцы паводле твора Якуба Коласа, якая магла б стаць новай візітнай карткай коласаўцаў. Чакаецца, што гэтым спектаклем стане "Сымон-музыка". Яго рэжысёрам выступіць выконваючы абавязкі мастацкага кіраўніка тэатра Міхаіл Краснабаеў, на галоўную ролю прэтэндуе Раман Салаўёў. Гледачам пастаноўку плануецца прадставіць у канцы сакавіка 2018 года і ўжо ёю адкрыць тэатральны сезон наступнага года. "Мы зробім усё магчымае, каб гэты спектакль быў пастаўлены на самым высокім узроўні і заслужыў права стаць новай візітнай карткай коласаўцаў", - падкрэсліў Аляксандр Старых.

Традыцыйным спектаклем адкрыцця Коласаўскага тэатра ўжо больш за 70 гадоў з'яўляецца камедыя "Несцерка" паводле п'есы Віталя Вольскага. 9 верасня новы 92-і тэатральны сезон зноў адкрыецца гэтай пастаноўкай. Закранаючы ў цэлым рэпертуар новага сезона, дырэктар тэатра расказаў, што ён будзе разнапланавым, але верасень пройдзе пад знакам камедый. Тэатралаў чакаюць спектаклі "Дзіўная місіс Сэвідж", "Доктар філасофіі", прэм'ера рамантычнай камедыі "Самая жаданая" паводле п'есы сучаснага беларускага драматурга Сяргея Гіргеля і інш. Пачатак сезона таксама будзе азнаменаваны актыўным удзелам коласаўцаў у фестывальнай дзейнасці. Так, 21-25 верасня пастаноўка "Тр'ям! Вітаю!" будзе прадстаўлена на фестывалі казак "Казачны джэм" у Мінску, а ў кастрычніку спектакль "Шагал... Шагал..." заяўлены ў праграме XXXIII Міжнароднага тэатральнага фестывалю "Ліпецкія тэатральныя сустрэчы".

БЕЛТА.