Віцебская абласная філармонія да 10-годдзя духавога аргана падрыхтавала праграму "Музыка па-за часам"

Юбілейны канцэрт запланаваны на 19 кастрычніка. У філармоніі выступіць адзін з лепшых арганістаў Расіі - лаўрэат міжнароднага конкурсу, арганіст Кафедральнага сабора Калінінграда Яўген Аўраменка. У праграме "Музыка па-за часам" прагучаць творы Баха, Вівальдзі, Бёльмана і іншых. У канцэрце прыме ўдзел акадэмічны хор Віцебскага дзяржаўнага музычнага каледжа імя Івана Салярцінскага, а таксама салісты філармоніі Уладзіслаў Міцэнка (скрыпка) і Алена Гракава (сапрана).

Духавы арган нямецкай фірмы Glatter-Gotz у Віцебскай абласной філармоніі быў устаноўлены ў 2007 годзе. Гэта трэці ў Беларусі арган (пасля Беларускай дзяржаўнай філармоніі і Сафійскага сабора Нацыянальнага Полацкага гісторыка-культурнага музея-запаведніка), размешчаны не ў культавай установе. Адметная канструктыўная асаблівасць віцебскага аргана - спалучэнне гучання французскіх познарамантычных інструментаў і нямецкага рамантычнага аргана. Інтаніроўку гэтага караля інструментаў праводзіў французскі арганны майстар Жан Франсуа Дюпон. Інструмент налічвае 36 рэгістраў, якія даюць магчымасць выконваць музыку любых стыляў і напрамкаў. За дзесяць гадоў адбылося больш за сто арганных канцэртаў з удзелам выканаўцаў з больш як дваццаці краін.

БЕЛТА.